کوئٹہ: سیلاب کی تباہ کاریاں اور سخت مشکلات کے باوجود بلوچستان کے علاقے صحبت پور کے 11 سالہ احمد حسن کا جذبہ حب الوطنی کم نہیں ہوا، اسے امید ہے کہ یہ وقت گزر جائے گا، اچھا وقت آئے گا، اس کا ٹوٹا ہوا گھر دوبارہ بن جائے گا، وہ بڑا ہوکر فوجی بنے گا، اپنے ملک کی خدمت کرے گا اور پاکستان کو مزید مضبوط کرے گا۔

گزشتہ دنوں وزیر اعظم شہباز شریف نے صحبت پور کا دورہ کیا، جو سیلاب سے سب سے زیادہ متاثر ہوا ہے۔ وہاں امدادی کیمپ میں وزیر اعظم نے اسکول کے بچوں سے ملاقات کی۔ اس دوران احمد حسن نے قومی ترانہ پڑھ کر سنایا، جس پر وزیر اعظم بہت خوش ہوئے اور اس کیلئے نیک تمنائوں کا اظہار کیا۔

وزیراعظم شہباز شریف نے 11 سالہ احمد حسن کی حوصلہ افزائی کیلئے خود بھی تالیاں بجائیں اور وہاں موجود دیگر افراد سے بھی بچے کیلئے تالیاں بجانے کا کہا۔ وزیراعظم کی بچے سے قومی ترانہ سننے کی ویڈیو سوشل میڈیا پر خوب پسند کی گئی۔ ویڈیو میں دیکھا جا سکتا ہے کہ ایک موقع پر احمد قومی ترانہ بھول گیا تھا، جو وزیر اعظم نے اسے خود یاد دلایا۔

وزیر اعظم نے وطن عزیز سے والہانہ محبت رکھنے والے احمد حسن سے پوچھا کہ وہ کہاں کا رہنے والا ہے، جس پر اس نے بتایا کہ وہ اللہ بخش کمالی کا رہنے والا ہے، تیسری جماعت کا طالب علم ہے، سیلاب کے وقت اس کے گھر میں پانی آگیا تھا اور اب اس کا گھر ٹوٹ چکا ہے، علاقے میں اب بھی پانی کھڑا ہے۔

وزیراعظم صحبت پور کے دورے کے دوران ایک کیمپ میں قائم اسکول بھی گئے اور بچیوں سے ملاقات کر کے ان کے مسائل حل کرنے کی یقین دہانی بھی کرائی۔ وزیراعظم شہباز شریف نے بچوں کو اپنی تعلیم پر توجہ دینے کا زور دیتے ہوئے کہا کہ حکومت ان کے تباہ شدہ اسکول بھی تعمیر کرکے دے گی۔

واضح رہے کہ صحبت پور صوبہ بلوچستان کا ایک ضلع ہے۔ ضلع کا نام خان بہادر سخی صحبت خان گولہ کے نام پر رکھا گیا جنہیں ان کی بہادری اور سخاوت کے بدولت خان بہادر اور سخی کا خطاب دیا گیا تھا۔

اس کے مشہور علاقوں میں گورناڑی، حیردین، مانجھی پور، حامدپور، آدم پور، گوٹھ کٹوھر، بھنڈشریف، چتن پٹی، نورپور، جیانی، احمدان پل، جھنڈہ تلاب (ذاکر آباد)، چاندنی چوک، حمیدآباد، کاپاری، درگاہ مولوی قادر بخش اور صحبت پور سٹی شامل ہیں۔ ضلع صحبت پور کا صدر مقام صحبت پور ہے۔ یہ ایک زرعی ضلع ہے۔