غیر ملکی خبر ایجنسی کے مطابق  تبت سے متصل  شمال مشرقی بھارتی ریاست سکم  کی سرحد پر گشت کے دوران دونوں ممالک کی فوجوں کے درمیان سخت جملوں کا تبادلہ ہوا جس کے بعد دونوں جانب سے ایک دوسرے پر پتھراؤ بھی کیا گیا اور نوبت ہاتھا پائی تک پہنچ گئی  اور کچھ  چینی فوجی  بھی زخمی ہوئے تاہم چینی فوجیوں کا پلڑا بھاری رہا۔

بھارتی فوج کی مشرقی کمانڈ کے ترجمان مندیپ ہودا کا کہنا ہے کہ واقعے میں دونوں اطراف کے فوجی زخمی ہوئے ہیں تاہم کوئی بھی شدید زخمی نہیں ہوا۔مندیپ ہودا نے کہا  ہے کہ یہ معاملہ مقامی سطح  پر ہی  مذاکرات کے بعد حل کرلیا گیا ہے۔

واضح  رہے کہ چین اور بھارت کے درمیان طویل سرحد موجود ہے اور دونوں میں سرحدی تنازعہ بھی پایا جاتا ہے، بلندی پر واقع بارڈر پر اکثر و بیشتر دونوں ممالک  کے فوجی گشت کے دوران آمنے سامنے آجاتے ہیں۔اس سے قبل  کئی بار چین، بھارت کو خبردار کرچکا ہے کہ بھارت چینی فوج کی صلاحیتوں پر غلط فہمی میں نہ رہے، پہاڑ کو ہلانا آسان ہے لیکن چین کی پیپلز لبریشن آرمی کے عزم کو متزلزل کرنا مشکل ہے۔سرحدی تنازعے کے باعث ہی دونوں ممالک کے درمیان 1962 میں ایک جنگ بھی ہوچکی ہے۔