لاہور(سپورٹس رپورٹر)گورنر ہاؤس کے سیکنڈری سکول میں نویں جماعت کے سٹوڈنٹ عمر صدیق اپنے شاندار کھیل کے ذریعے پاکستان کا سبز ہلالی پرچم پوری دنیا میں بلند کرنے کیلئے پُر عزم ہیں۔خداد اد صلاحیتوں کے مالک نوجوان آل راؤنڈر عمر صدیق نے بتایا کہ عبد الرزاق اور جیک کیلس میرے فیورٹ آل راؤنڈر ہیں جس طرح عبدالرزاق نے مشکل صورتحال میں اپنی سوئنگ سے بھرپور باؤلنگ اور جارہانہ بیٹنگ کے ذریعے بہترین کارکردگی دکھا کر قومی ٹیم کو فتوحات دلوائیں میں بھی انہی کے نقش قدم پر چلتے ہوئے پاکستان کرکٹ ٹیم کو کامیابیاں دلوانے کا خواہش مند ہوں،میں دنیا کا بہترین آل راؤنڈر بننا چاہتا ہوں اس مقصد کی تکمیل کیلئے انتھک محنت کر رہا ہوں اگر قومی سلیکشن کمیٹی نے ملک کی خدمت کرنے کا موقع دیا تو میں پاکستان کرکٹ ٹیم میں میچ ونر آل راؤنڈ ر کا خلا پُر کر سکتا ہوں۔

دس سال کی عمر میں کرکٹ کا آغاز کرنے والے عمر صدیق نے بتایا کہ میں لاہور سٹی کرکٹ ایسوسی ایشن (ایل سی سی اے)گراؤنڈ میں شعیب کرکٹ اکیڈمی میں نیٹ پریکٹس کرتا ہوں،پاکستان کی ون ڈے اور ٹی ٹونٹی کرکٹ ٹیم کے کپتان بابر اعظم نے کلب کرکٹ کا آغاز اسی اکیڈمی سے کیا تھا،شعیب کرکٹ اکیڈمی کے ہیڈ کوچ شعیب منصور نہایت شفیق،ہمدر،مہربان اور کرکٹ کے کھیل کو باریک بینی سے سمجھنے والے انسان ہیں ان کی بہترین اور بروقت کوچنگ کی بدولت ہی بابر اعظم کی بیٹنگ میں نکھار پیدا ہوا،اور وہ ترقی کی منازل طے کرتا ہوا پاکستان کرکٹ ٹیم کی کپتانی تک پہنچ گیا۔کرکٹ کے کھیل سے جنون کی حد تک لگاؤ رکھنے والے بے

پناہ صلاحیتوں کے حامل آل راؤنڈر عمر صدیق کا کہنا ہے کہ میں اپنے کھیل میں بہتری کیلئے سخت محنت کر رہا ہوں،میرے والدین کی دُعائیں میرے ساتھ ہیں مجھے یقین ہے کی انہی دُعاؤں کے طفیل اللہ تعالیٰ مجھے بھی کرکٹ کے کھیل میں کامیابیوں سے سرفراز کرے گا۔گورنر ہاؤس کے سیکنڈری سکول میں نویں جماعت کے سٹوڈنٹ عمر صدیق نے مزید کہاکہ کھیل امن اور دوستی کی علامت ہو تے ہیں جبکہ صحت مند قوم ہی ترقی کی ضامن ہو تی ہے لہٰذاسپورٹس مین وزیر اعظم عمران خان کھیلوں کے میدان آباد کریں کیونکہ کھیلوں کے فروغ سے معاشرے میں پروان چڑھتی ہوئی تنگ نظری اور انتہا پسندی کی سوچ کا خاتمہ ممکن ہے اورکھیلوں کے میدان آباد ہونے سے پاکستان کا سافٹ امیج دُنیابھر میں امن کی خوشبو کی طرح پھیلے گا جبکہ کھیل کے میدان آباد ہونے سے ہی ہسپتال ویران ہوں گے۔