لندن: برطانوی خبر رساں ایجنسی کے مطابق سام سنگ الیکٹرونکس کمپنی اپنی پریمیئر گلیکسی نوٹ سیریز کو ختم کرنے کا ارادہ رکھتی ہے اور اس کا آئندہ سال 2021 میں گلیکسی نوٹ کا نیا ورژن متعارف کرانے کا کوئی منصوبہ نہیں۔ یہ پیش رفت بتاتی ہے کہ کرونا وبا کے باعث انتہائی منگے سمارٹ فونز کی طلب میں تیزی سے کمی آئی ہے۔

بڑی سکرین اور اسٹائلس پین کی وجہ سے منفرد مقام رکھنے والا گلیکسی نوٹ سام سنگ کی دو پریمیئر فون سیریز میں سے ایک ہے۔ گلیکسی ایس سام سنگ کی دوسری فلیگ شپ سیریز ہے۔ برطانوی نیوز ایجنسی رائٹرز نے اپنے ذرائع کے حوالے سے بتایا ہے کہ گلیکسی ایس کے اگلے ماڈل S21 میں اسٹائلس پین موجود ہوگا، کمپنی کا اگلا فولڈایبل فون بھی اسٹائلس پین کو سپورٹ کرے گا۔

ذرائع کے مطابق گلیکسی نوٹ کو الوداع کہنے کے بعد کمپنی اپنی تمام توانائی اور وسائل فولڈایبل فونز پر صرف کرے گی۔ سام سنگ نے اس رپورٹ پر اپنا ردعمل دینے سے گریز کیا ہے۔

ریسرچ فرم کاؤنٹر پوائنٹ سے وابستہ مبصر ٹام کینگ کے مطابق گلیکسی نوٹ سیریز کی سیلز رواں سال گر کے 80 لاکھ تک آ چکی ہے۔ جبکہ ایس سیریز کی سیلز 50 لاکھ یونٹس گر کر کُل تین کروڑ سے نیچے چلی گئی۔ رواں سال پریمیئم فونز کی طلب میں کمی آئی ہے اور کئی لوگ نئے ماڈلز کے منتظر بھی نہیں۔

واضح رہے کہ گلیکسی نوٹ 20 رواں سال امریکہ میں ایک ہزار ڈالرز قیمت کے ساتھ لانچ کیا گیا تھا جبکہ آئی فون 12 کی قیمت آٹھ سو ڈالرز سے شروع ہوتی ہے۔ سام سنگ نے پہلا نوٹ فون 2011 میں ریلیز کیا تھا، جس کی وجہ سے مارکیٹ میں بڑی سکرین والے فونز کو نئی پہچان ملی۔ اسی سال سام سنگ گلیکسی نوٹ کی مدد سے پہلی بار ایپل کو پیچھے چھوڑتے ہوئے دنیا کا سب سے بڑی اسمارٹ فون کمپنی بنی تھی۔