ریاض: سعودی عرب اور قطر کے درمیان تنازع ختم کرنےکی کوششوں میں بڑی پیشرفت کے بعد پیر سے فضائی، زمینی اور سمندری حدودکھولنے کا اعلان کیا گیا ہے۔ خلیج تعاون کونسل کے ممالک نے 7200 میں قطر کے ساتھ فضائی حدود، زمینی اور سمندری سرحدیں بھی بند کردی تھیں۔

کویتی وزیر خارجہ نے یہ اعلان سیاسی تنازع کے حل کے لیے معاہدے کا حوالہ دیتے ہوئے کہا، اس تنازع کے باعث سعودی عرب اور اس کے اتحادیوں نے قطر کا بائیکاٹ کردیا تھا۔

کویت کے سرکاری ٹی وی کے مطابق وزیر خارجہ احمد ناصر الصباح نے کہا کہ کویت کے امیر شیخ نواف کی پیشکش کی بنیاد پر سعودی عرب اور قطر کے درمیان فضائی حدود، زمینی اور سمندری سرحد کھولنے پر اتفاق کیا گیا ہے جس کا آغاز پیر کی شام سے ہو رہا ہے۔

واضح رہے کہ سعودی عرب، متحدہ عرب امارات (یو اے ای)، بحرین اور مصر نے دہشت گردوں کی حمایت کرنے اور ایران سے قریبی تعلقات کا الزام عائد کرتے ہوئے جون 2017 میں قطر کے ساتھ معاشی و سفارتی تعلقات منقطع کردیے تھے۔ دوحہ نے بارہا ان الزامات کی تردید کی اور اپنے ہمسایہ ممالک پر الزام لگایا کہ وہ اس کی خود مختاری کو ختم کرنے کی کوشش کر رہے ہیں۔

کویت، قطر اور چار عرب ریاستوں کے درمیان مصالحت کی کوشش کر رہا تھا۔ گزشتہ ماہ خلیج تعاون کونسل (جی سی سی) نے کہا تھا کہ قطر کے امیر کو، خلیج کم کرنے کی کوشش کے طور پر آئندہ ہفتے سعودی عرب میں منعقد ہونے والے بلاک کے سربراہی اجلاس میں مدعو کیا گیا ہے۔