تازہ ترین
روس کے شہر سینٹ پیٹرز برگ کے اسپتال میں آتشزدگی کے نتیجے میں وینٹی لیٹر پر موجود 6 کوروناوائرس کے مریض ہلاک ہوگئے۔ روسی خبررساں ادارے کے مطابق سینٹ پیٹرز برگ کے سینٹ جارج ہسپتال کی چھٹی منزل پر کوروناوائرس کے مریضوں کے لیے مختص انتہائی نگہداشت کے یونٹ میں آگ بھڑک اٹھی۔
آتشزدگی کے نتیجے میں وینٹی لیٹرز پر موجود 5 کورونا وائرس مریض ہلاک ہوگئے جبکہ ریسکیو ٹیموں نے آگ پر قابو پاکر 150 افراد کو زندہ وارڈ سے بحفاظت نکال لیا۔ہسپتال ذرائع کے مطابق انتہائی نگہداشت کے یونٹ میں آگ وینٹی لیٹر میں فالٹ کی وجہ سے لگی جس کے باعث زہریلے مادے کے اخراج سے مریضوں کی موت واقعہ ہوئی۔دوسری جانب ہسپتال کے انتظامیہ نے واقعے کی تحقیقات مکمل ہونے تک ایونٹا ایم ماڈل کے وینٹی لیٹرز کا استعمال روک دیا ہے جبکہ متعلقہ حکام نے واقعے کی تحقیقات شروع کردی ہیں۔
واضح رہے کہ حالیہ چند دنوں میں ہسپتالوں میںآتشزدگی کا یہ دوسرا واقعہ ہے ، اس سے قبل 9 مئی کو بھی ماسکو میں کورونا وائرس کے مریضوں کے لیے مختص ہسپتال میںآگ لگ گئی تھی جس کے نتیجے میں ایک مریض ہلاک ہوگیا تھا۔ روس میں کورونا وائرس سے متاثرہ افراد کی تعداد فرانس اور جرمنی سے بھی زیادہ ہو گئی ہے۔
روس میں گزشتہ 24 گھنٹوں کے دوران مزید 10 ہزار سے زائد کورونا کیسز رپورٹ ہوئے ہیں جس کے بعد متاثرہ مریضوں کی تعداد 2 لاکھ 32 ہزار سے زائد ہوچکی ہے اور اس وقت متاثرہ افراد کی تعداد کے اعتبار سے روس کا دنیا میں تیسرا نمبر ہے۔روس میں اب تک 2116 افراد کورونا وائرس سے ہلاک ہوچکے ہیں۔
