لاہور: قومی ٹیم کے ہیڈ کوچ مصباح الحق چیف سلیکٹر کے عہدے سے دستبردار ہوگئے۔ واضح رہے کہ مصباح الحق کو 4 ستمبر 2019 کو قومی ٹیم کا ہیڈ کوچ اور چیف سلیکٹر مقرر کیا گیا تھا، دوہری ذمہ داری ملنے پر سابق کپتان نے اس عزم کا اعادہ کیا تھا کہ وہ قومی ٹیم کیلئے دلیر اور فائٹنگ کرکٹرز تیار کریں گے۔ تاہم انہوں نے اب چیف سلیکٹر کے عہدے سے استعفیٰ دینے کا باقاعدہ اعلان کر دیا ہے۔

مصباح الحق نے چیف سلیکٹر کا عہدہ چھوڑنے کا اعلان لاہور میں پریس کانفرنس کرتے ہوئے کیا۔ ان کا کہنا تھا عہدہ چھوڑنے کے حوالے سے مختلف باتیں کی جا رہی ہیں لیکن ان میں کوئی صداقت نہیں ہے، اگر افواہوں میں سچ ہوتا تو پھر دونوں عہدے جاتے۔ انہوں نے وضاحت کرتے ہوئے بتایا کہ عہدہ چھوڑنے کی وجہ چیئرمین پی سی بی احسان مانی یا وزیراعظم سے ملاقات نہیں ہے بلکہ یہ میرا ذاتی فیصلہ ہے۔

ان کا کہنا تھا آئندہ 10 سال میں 10 کمٹمنٹس ہیں اس لیے یہ عہدہ چھوڑ رہا ہوں، پاکستان کرکٹ بورڈ نے مجھے یہ آپشن دیا تھا کہ چاہیں تو ایک عہدہ چھوڑ دیں۔ چیف سلیکٹر کی ذمہ داری 30 نومبر تک نبھاؤں گا، اور زمبابوے کے خلاف سیریز کے لیے کھلاڑیوں کا انتخاب بھی میں ہی کروں گا۔ نئے چیف سلیکٹر کے طور پر جو بھی آیا اس کے ساتھ مل کر کام کروں گا۔

دوسری جانب ذرائع کا کہنا ہے کہ ایک ساتھ دو بڑے عہدے ہونے کی وجہ سے مصباح الحق پر دباؤ بھی تھا اور انہیں تنقید کا نشانہ بنایا بھی جا رہا تھا۔ ذرائع کے مطابق مصباح الحق اس وجہ سے ناخوش بھی تھے کہ جو لوگ انہیں تنقید کا نشانہ بنا رہے تھے انہیں سلیکشن کمیٹی کا حصہ بنا دیا گیا تھا۔