تازہ ترین
کراچی: پاکستان اور جنوبی افریقہ کے درمیان کراچی میں جاری پہلے ٹیسٹ کے پہلے روز بالروں کا نام رہا۔ جنوبی افریقہ کے محض 220 رنز پر آل آؤٹ ہو جانے کے بعد پاکستانی ٹیم بھی مشکلات کا شکار ہوگئی ہے۔ کھیل کے اختتام پر پاکستان کے 33 رنز پر 4 کھلاڑی پویلین لوٹ چکے تھے، جن میں بابر اعظم بھی شامل ہیں۔
پاکستان کو اب مہمان ٹیم کی سبقت ختم کرنے کے لیے 187 رنز درکار اور اس کی 6 وکٹیں محفوظ ہیں۔ کراچی کے نیشنل اسٹیڈیم میں کھیلے جارہے سیریز کے پہلے میچ کا ٹاس جنوبی افریقا کے کپتان کوئنٹن ڈی کاک نے جیت کر خود بیٹنگ کرنے کا فیصلہ کیا۔
مہمان ٹیم کی جانب سے ایڈم ماکرم اور ڈین ایلگر نے اننگز کا جارحانہ آغاز کیا تاہم شاہین آفریدی نے 30 کے مجموعی اسکور پر ایڈم کو واپس پویلین بھیج دیا وہ 13 رنز بناکر آؤٹ ہوئے۔
تیسرے نمبرپر بیٹنگ کے لیے آنے والے راسی وین ڈیر ڈوسن 17 رنز بنانے کے بعد رن آؤٹ ہوئے۔ سابق جنوبی افریقی کپتان فاف ڈوپلسی بھی 23 رنز کے مہمان ثابت ہوئے اور کپتان کوئنٹن ڈی کاک بھی بڑی اننگز کھیلنے میں ناکام رہے وہ 15 رنز بناکر آؤٹ ہوئے۔ ڈوسن کے بعد ٹیمبا باووما بھی رن آؤٹ ہوئے، وہ صرف 17 رنز ہی بناسکے۔
دوسری جانب اوپننگ بلے باز ڈین ایلگر نے ذمہ دارانہ اننگز کھیلتے ہوئے نصف سنچری اسکور کی تاہم وہ 58 رنز بنانے کے بعد اسپنر کا شکار بن گئے۔ کیشو مہاراج کھاتہ کھولے بغیر ہی پویلین واپس لوٹ گئے۔ کاگیسو ربادا نے پاکستانی بولنگ کے خلاف مزاحمت کی کوشش کی اور 21 رنز بناکر ناٹ آؤٹ رہے۔
تاہم دوسرے اینڈ سے کوئی بھی ٹیل اینڈر زیادہ دیر وکٹ پر کھڑا نہ رہ سکا اور جنوبی افریقا کی پوری ٹیم 220 رنز پر آؤٹ ہوگئی۔ قومی ٹیم کی جانب سے لیگ اسپنر یاسر شاہ نے 3، ڈیبو کرنے والے لیفٹ آرم اسپنر نعمان علی سمیت شاہین شاہ آفریدی نے 2،2 جبکہ حسن علی نے ایک وکٹ حاصل کی۔
جواب میں پاکستان کی اننگ کا آغاز بھی مایوس کن رہا، دونوں اوپنر صرف 15 رنز کے اسکور پر پولین لوٹ گئے۔ اوپنر عابد علی نیوزی لینڈ میں ناکامی کا سفر جاری رکھااور جنوبی افریقہ کے خلاف صرف4 رنز بناکر روباڈا کی گیند پر بولڈ ہوگئے، 5 رنز پر پہلی وکٹ گرنے کے بعد ڈبیو کرنے والے عمران بٹ بھی صرف 9 رنز بناکر روباڈا کا شکار بننے، انہیں متبادل پیٹرسن نے کیچ آﺅٹ کیا۔
26 رنز پر پاکستان کی امیدوں کا مرکز کپتان بابراعظم بھی اپنی وکٹ گنوا بیٹھے، وہ 7 رنز بناکرکیشومہاراج کی گیند پر ایل بی ڈبلیو ہوئے،پاکستان کو چوتھا نقصان 27 رنز پر نائٹ واچ کی حیثیت سے آنے والے شاہین شاہ آفریدی کی وکٹ کھو کر ہوا، وہ کوئی رن بنائے بغیر نارٹج کی گیند پر بولڈ ہوئے، اظہر علی 5 رنز کے ساتھ کریز پر ہیں۔
