کراچی: قومی ٹیم کے فاسٹ بالر جنید خان نے کہا ہے کہ وہ سلیکٹرز کو متاثر کرنے کے لیے سخت محنت کررہے ہیں اور مستقبل قریب میں قومی ٹیم میں کم بیک کے لیے پرامید ہیں۔ انہوں نے کہا کہ میرے پاس انگلینڈ کی شہریت ہے اور کاؤنٹی کرکٹ کھیل کر اس سے زیادہ رقم کما سکتا ہوں جو ڈومیسٹک کرکٹ کھیل کر کما رہا ہوں، لیکن میں پاکستان کی نمائندگی اور خدمت کرنا چاہتا ہوں کیونکہ اس ملک نے ہی مجھے سب کچھ دیا ہے اور میں نے جو کچھ بھی حاصل کیا ہے وہ پاکستان کی وجہ سے ہی ہے۔

22 ٹیسٹ، 76 ون ڈے اور 9 ٹی20 میچوں میں قومی ٹیم کی نمائندگی کرنے والے فاسٹ بالر نے کہا کہ سلیکٹرز کو کھلاڑیوں سے ان کے سلیکشن اور مستقبل کے بارے میں بات کرنی چاہیے جو ایک پیشہ ورانہ طریقہ ہے اور انگلینڈ اور آسٹریلیا میں اسی طرح کیا جاتا ہے۔

انہوں نے کہا کہ جہاں تک میرا سوال ہے تو میں اب بھی پاکستان کے اسکواڈ میں کم بیک کر سکتا ہوں کیونکہ مجھ میں کافی کرکٹ باقی ہے، میرا کسی بھی فارمیٹ سے آرام لینے کا کوئی ارادہ نہیں، ،میں نے نیشنل ٹی20 کپ کھیلی اور قائد اعظم ٹرافی کھیل رہا ہوں اور پاکستان ٹیم میں جگہ بنانے کے لیے بھرپور محنت کر رہا ہوں۔

واضح رہے کہ گزشتہ برس ورلڈ کپ اسکواڈ سے اخراج پر بطور احتجاج جنید خان نے اپنی ایک تصویر سوشل میڈیا پر پوسٹ کی تھی جس میں ان کے منہ پر ٹیپ لگا ہوا تھا۔ اس حوالے سے گفتگو کرتے ہوئے جنید نے کہا کہ وہ پوسٹ اس بات کا ردعمل تھا کہ مجھے ٹیم سے اخراج کی خبر میڈیا سے ملی اور سلیکٹرز نے مجھے اس بارے میں نہیں بتایا جن تجربہ کار کھلاڑیوں نے پاکستان کرکٹ کی خدمات کی ہے وہ زیادہ عزت کے مستحق ہیں۔

فاسٹ بالر نے کہا کہ جس دن انہیں لگا کہ وہ کم بیک نہیں کر سکتے، جنید نے کہا کہ وہ پاکستان سپر لیگ کے پلے آف میں اپنی فرنچائز ملتان سلطانز کے لیے اچھی کارکردگی کے لیے پرعزم ہیں اور موجودہ صورتحال میں پاکستان میں بین الاقوامی کرکٹرز کی آمد ملک میں کرکٹ کی بہتری کے لیے خوش آئند ہوگی۔