بھارتی خفیہ ایجنسی ’’را‘‘ نے اپنے ادارے کے پہلے سربراہ رام ناتھ کاو کے سالانہ یادگاری پروگرام میں صحافیوں کو شرکت سے روک دیا ہے۔ بھارتی ذرائع ابلاغ کے مطابق پہلے تو صحافیوں کو اس پروگرام میں آنے کے لیے دعوت نامہ دیا گیا لیکن تقریب سے ایک دن قبل انہیں اچانک فون کر کے منع کر دیا گیا۔ ان سے کہا گیا کہ انہیں پروگرام میں آنے کی اجازت نہیں ہے۔ بتایا جا رہا ہے کہ اس مرتبہ مودی کا قریبی ساتھی وزیر داخلہ امت شاہ اس تقریب میں داخلی سیکورٹی پر تقریر کرے گا۔

انڈین ایکسپریس کے مطابق ’’را‘‘ ہیڈ کوارٹر میں منعقد ہونے والے رام ناتھ کاو سالانہ یادگاری تقریب میں کچھ معروف صحافیوں کو مدعو کیا گیا تھا، لیکن بعد ازاں انہیں آنے سے منع کر دیا گیا۔ اس سے قبل اس مہینے کے شروع میں ہی کچھ صحافیوں کو شناخت سے متعلق کاغذات دستیاب کرا دئیے گئے تھے، لیکن گزشتہ اتوار کو ’’را‘‘ کے افسران نے انہیں فون کر اسے واپس لینے کی اطلاع دی۔ اس دوران کہا گیا کہ پروگرام میں میڈیا کو آنے کی اجازت نہیں ہوگی۔ واضح رہے کہ بھارتی خفیہ ایجنسی (ریسرچ اینڈ اینالیسز ونگ) کے سابق سربراہ رام ناتھ کاو کی یاد میں ہر سال اس تقریب کا انعقاد ہوتا ہے۔

رام ناتھ کاو کی یاد میں منعقد ہونے والی اس تقریب کی شروعات 2007 میں ہوئی تھی اور ان کے یوم وفات کے دن ہی اس کا انعقاد ہوتا ہے۔ یہ یادگاری تقریب ’’را‘‘ کے کیلنڈر میں ایک پر جوش ایونٹ بن گیا ہے۔ یہ واحد موقع ہے جب میڈیا کے ایک حصے کو لودی روڈ کے پاس را ہیڈ کوارٹر کے اعلیٰ سیکورٹی والے علاقے میں داخل ہونے کی اجازت دی گئی۔ اس پروگرام کے دوران صحافیوں کو سیکورٹی پر تقریر کرنے والوں سے سوال پوچھنے کا کھلا موقع ملتا تھا۔ اس تقریب رام ناتھ کاو کی فیملی کے اراکین اور کاو کے بیٹوں کو بلایا جاتا ہے۔

قابل ذکر بات یہ ہے کہ اس تقریب میں اس سے پہلے بھارت کی کئی معروف شخصیات حصہ لیتی رہی ہیں۔ دعوت نامے منسوخ کئے جانے پر بھارت میں سوال اٹھائے جا رہے ہیں کہ کیا امت شاہ تقریر کرنے والا ہے اسی لیے صحافیوں کا دعوت نامہ کینسل کیا گیا ہے۔