لاہور کے براق ہائی اسکول میں اے اے ایم نیشن کیئر کے تعاون سے جونیئر تائیکوانڈو چیمپئن شپ 2022ء منعقد کی گئی، جس میں بچوں نے بھرپور شرکت کی۔ عمدہ کارکردگی دکھانے والے بچوں کو میڈلز دیئے گئے۔ ایونٹ کا سلوگن ’’کھیلیں گے بچے، جیتے گا پاکستان‘‘ تھا۔

اتوار کو نیشنل تائیکوانڈو کلب کے زیر اہتمام ہونے والی چیمپئن شپ چیمپئن شپ کے مہمان خصوصی اے اے ایم نیشن کیئر فاؤنڈیشن کے بانی عبداللہ امانت محمدی تھے، جنہوں نے ٹاپ پوزیشن لینے والے بچوں کو میڈل پہنائے۔ اس موقع پر بچوں سے بات چیت کرتے ہوئے عبداللہ امانت محمدی کا کہنا تھا کہ آپ تعلیم اور کھیل کے میدان میں کامیابی کے جھنڈے گاڑ کر ملک کا نام روشن کریں۔

عبداللہ امانت محمدی نے مزید کہا کہ کھیلوں کا فروغ کسی بھی قوم کی ذہنی اور جسمانی نشوونما کیلئے انتہائی ضروری ہے۔ بچپن میں ویسے بھی بچے کھیل کود کے شوقین ہوتے ہیں، انہیں صرف پلیٹ فارم مہیا کرنے اور ان کے ٹیلنٹ کو نکھارنے کی ضرورت ہے۔

بانی اے اے ایم نیشن کیئر نے کہا کہ وسائل کی کمی کی وجہ سے والدین اپنے بچوں کو اسپورٹس مین نہیں بنا پاتے، جس سے حقیقی ٹیلنٹ سامنے نہیں آتا۔ حکومت کو چاہیئے کہ گراس روٹ لیول سے ایسے پروگرام بنائیں، تاکہ یہ بچے مستقبل میں قوم کا اثاثہ بن سکیں۔

قبل ازیں چیئرمین آرگنائزنگ کمیٹی خاور محمود اور براق ہائی اسکول کے طلبہ نے عبداللہ امانت محمدی اور ان کے ساتھیوں حسن رضا اور ابوبکر کا پُرتپاک استقبال کیا اور انہیں گلدستے پیش کئے۔